next Section

The Last Swiss
Holocaust Survivors

Sco stadi neutral superescha la Svizra la Segunda Guerra mundiala per gronda part senza subir donns. Tgi èn las surviventas ed ils survivents dal holocaust en Svizra? La gronda part dad els n'èn lezza giada betg burgais svizzers. Els vegnan plitost dal Reich Tudestg u dad auters stadis europeics ed èn sco gidieus pertutgads directamain da la persecuziun naziunalsocialistica. Insaquants survivan champs da concentraziun e d'exterminaziun, auters mitschan cun fugir u sa zuppar. Ils blers vegnan pir suenter la Segunda Guerra mundiala en Svizra.

Ch'i dat er en Svizra surviventas e survivents dal holocaust vegn conscient a la publicitad pir en connex cun la debatta da las facultads senza identitad e las retschertgas istoricas da la «cumissiun Bergier» la fin dals onns 1990.

Ils onns 2017/2018 presidiescha la Svizra l'International Holocaust Remembrance Alliance (IHRA). L'exposiziun The Last Swiss Holocaust Survivors dat il pled ad insaquants da las ultimas perditgas dal temp dal holocaust ed a lur descendents.

Top

Lura han ins tetovà mai: 71978. Jau hai stuì bragir fitg. Betg pervia dal mal, na, pervia dal numer. Jau aveva pers mes num, jau era mo pli in numer. Mia mamma ha ditg: «Betg bragir, nagut n'è capità. Cura che nus vegnin a chasa, frequentas ti la scola da sautar e survegns in grond bratschlet, per che nagin na vesia il numer.» Jau n'hai mai frequentà la scola da sautar e mai survegnì in bratschlet.

Interview with Nina Weil

Nina Weil

Naschida il 1932 a Klattau (oz en Tschechia), viva a Prag e vegn deportada il 1942 a Theresienstadt. Pli tard vegnan sia mamma Amalie ed ella ad Auschwitz. Ella ha dudesch onns, cura che sia mamma (38) mora da la spussada e flaivlezza. Nina Weil superescha ina selecziun dal medi dal champ da concentraziun Josef Mengele e surviva en in champ da lavur. Suenter la suppressiun da la Primavaira da Prag survegnan ses um ed ella asil en Svizra. Ella è stada laboranta a l'ospital universitar da Turitg.

Top

Vers la fin da la guerra era jau en in commando da lavur dal champ da concentraziun. Nus mettevan rodaglias. Jau era il pli giuven ed il pli pitschen en la gruppa. L'entschatta eran nus 30 persunas. La fin dal 1944 vivevan anc duas persunas. Co che jau hai dumagnà quai? Jau hai gì fortuna. Jau aveva chavels resch cotschens. Ils Tudestgs numnavan mai «Rotkopf». Jau hai survegnì la lavur pli leva.

Interview with Fishel Rabinowicz

Fishel Rabinowicz

Naschì il 1924 a Sosnowiec en Pologna. L'onn 1943 vegnan assassinads ad Auschwitz sia mamma Sara (42) e ses sis fragliuns Esther (16), Jacob (12), Frimetta (10), Benjamin (8), Mania (6) e Beracha (3). Ses frar Jeheskiel (18) mora en il champ da concentraziun Faulbrück. Ses bab Israel Josef (46) vegn sajettà giu en il champ da concentraziun Flossenbürg. Fishel Rabinowicz passenta quatter onns en il champ da concentraziun ed en differents champs da lavur sfurzada e vegn deliberà a Buchenwald. L'onn 1947 vegn el cun ina gruppa da survivents en Svizra per sa recrear. Fishel Rabinowicz resta en Svizra e daventa schefdecoratur d'in grond negozi en il Tessin. Dapi ch'el è pensiunà elavura el sia biografia en maletgs grafics. Fishel Rabinowicz è vaiv ed ha in figl.

Top

Mia mamma ha protegì fitg mai a Ravensbrück. Ella fascheva extracommandos per in'ulteriura purziun schuppa ch'ella deva a mai. Jau hai emprendì da leger e scriver ed ils amulains sut circumstanzas terriblas. Mia mamma scheva: «Quai vegns ti anc a duvrar en tia vita.» Quai è stà magic. Quai vuleva dir: ti survivas.

Interview with Ivan Lefkovits

Ivan Lefkovits

Naschì il 1937 a Prešov (oz en Slovachia). L'atun 1944 vegnan Ivan, sia mamma Elisabeth e ses frar Paul deportads a Ravensbrück. Entant che Ivan dastga restar cun sia mamma, vegn ses frar pli vegl (15) separà dad els e manà en il champ d'umens e pli tard assassinà. Ivan e sia mamma survivan. Il 1969 vegn Ivan Lefkovits a Basilea per stabilir sco professer il nov Institut per immunologia.

Top